Select Page

Tilraunasmiðja

Vikan 16.- 22. júlí

Unnið með íslensk jarðefni og Dalaleir
Tilraunasmiðja fyrir fagmenn á sviði keramík og hönnunar

Í júlí 2007 unnu 10 fagmenn á sviði keramík og hönnunar að könnunum á möguleikum íslenskra jarðefna í glerungagerð fyrir keramik. Jarðefnin sem notuð voru komu víða að, meðal annars úr Dölum, Vatnajökli, Skeljavík á Ströndum og Heklu. Jafnframt var unnið með mismunandi brennsluaðferðir; gas- og viðarbrennslu, raku- og holubrennslu auk rafnmagnsbrennslu. Til gas- og viðarbrennslunnar var notaður þar til gerður útistandandi gas- og viðarbrennsluofn sem reistur var að Nýp á Skarðsstönd sumarið 2006, en rafmagnsbrennslan fór fram að Laugum í Sælingsdal.

Þátttakendur Tilraunasmiðju 2007 voru frá Íslandi, Írlandi, Japan og Danmörku.Rannsóknir og tilraunir
Í Dalasýslu eru mikil leirlög í jörðu, en þar er einnig töluvert af jarðefnum sem bera merki eldvirkni og hræringa, auk surtabrands. Allt frá fyrri hluta 20. aldar hafa íslenskir myndlistamenn og hönnuðir gert tilraunir og unnið rannsóknir í tengslum við íslenskan leir og jarðefni. Iðntæknistofnun hefur staðið fyrir viðamiklum rannsóknum á eiginleikum leirsins í Dölum, en þekktust fyrir athuganir sínar eru Guðmundur frá Miðdal, Ragnar Kjartansson, Kolbrún Björgólfsdóttir, Kristín Ísleifsdóttir, Sigríður Erla Guðmundsdóttir, auk Bjarnheiðar Jóhannsdóttur.

Glerungar
Þær glerungatilraunir sem gerðar voru að Nýp að þessu sinni eru skráðar og skjalfestar. Mjög áhugaverðar niðurstöður komu fram og er ljóst að íslensk jarðefni eru spennandi kostur sem hráefni í glerunga, í tengslum við myndlist og hönnun/keramík. Glerungabrennslan fór fram í Leirbrennsluofninum að Nýp, brennt var í 1270 gráðum. Til samanburðar voru einnig brenndar prufur í rafmagnsofni að Laugum í Sælingsdal. Afrakstur smiðjunnar var kynntur ýtarlega á sýningu í Myndlistaskólanum í Reykjavík haust 07.

Að smiðjunni stóðu 
Myndlistaskólinn í Reykjavík og Penna sf.
Bjarnheiður Jóhannsdóttir MA frá Listiðnaðarakademíunni í Búdapest, Ungverjalandi var faglegur stjórnandi smiðjunnar, en verkefnisstjóri Þóra Sigurðardóttir. Menningarsjóður Vesturlands, Glugga-og hurðasmiðja SB, Starfsmenntasjóður Reykjavíkurborgar og the Danish Arts Council veittu styrki vegna Tilraunasmiðju að Nýp á Skarðsströnd 2007.

Þátttakendur í Tilraunasmiðju að Nýp 2007

Asa Shimada Japan/Ísland
Anne Thorseth Danmörk
Gregory Barrett Írland
Steinunn Helgadóttir Ísland
Guðbjörg Magnúsdóttir Ísland
Anna S. Hróðmarsdóttir Ísland
Katrín V. Karlsdóttir Ísland
Lilja Sigrún Jónsdóttir Ísland
Ásta Þórisdóttir Ísland

Aðstoðarmaður í Tilraunasmiðju að Nýp 
Sumarliði R. Ísleifsson